زیارکښې ښځې یوازې د مبارزې له لارې کولای شي د ستمونو کړۍ ماتې کړي!

ستمګران تل هڅه کوي چې زیارکښان په بیلابیلو ډولونو تهدید کړي. له وژلو څخه تر اسارته پورې، له بردګۍ څخه تر تاوتریخوالي او ډبولو پورې، له کنځلو څخه د بدن غړي غوڅولو پورې او داسې نور تهدیدونه تل د زیارکښانو په وړاندې موجود دي. دا ګواښونه او تهدیدونه په ټولیزه توګه په دوو موخو تر سره کیږي:د ستمګرانو لپاره د لا لوټنې زمینه برابرول او د زیارکښانو د مقاومت ځپل.

د افغانستان زیارکښه میرمنې هغه بیوزلی میرمنی دي چې د مختلفو ستمونو لاندې ژوند کوي. دا بیوزله میرمنې د امریکا او ناټويي سرتیرو لخوا په بیرحمۍ بمباري کیږي، ټوپکسالاره تنظیمی وحشيان ورباندې جنسی تیری کوي او طالبان هم د خپلو فاشیستي سیاستونو سره  سم د هغوې ژوند له حیواناتو سره برابر کړی دی. د دې تر څنګ ځینې نارینه هم خپل نارینتوب پر ښځو په بیرحمانه ستم کولو کې ویني!!

د افغانستان د بشري حقونو کمیسیون په دې وروستیو کې راپور ورکړی چې د روان لمریز هجری کال په لومړیو دری میاشتو کې د ښځو په وړاندې د تاوتریخوالي د بیلابیلو ډولونو ۱۵۰۰ مورده ثبت شوي دي. تیر کال د ښځو په وړاندې د تاوتریخوالي ۵۰۰۰ مورده ثبت شوي وو.

دا شمیرې که څه هم له اصلي شمیرو سره ډیر تفاوت لري او د بیوزلو میرمنو په وړاندې د ستم او تاوتریخوالي کچه د دې څو چنده ده، خو دا شمیرې هم ښکاره کوي چې د امریکا په خونړۍ دموکراسۍ کې دا میرمنی او ماشومان دي چې د نورو په پرتله غم لړلی او دردمن ژوند تیروي او په بیرحمه توګه ځپل کیږي.

زیارکښه ښځې لکه د نورو زیارکښانو په شان هغه ځواک دی که چیرې په یو رښتیني او ژمن بنسټ او نهاد کې سره راغونډ شي او د یو مخکښه دموکراتیک سیاست سره مبارزه او تلاش وکړي، نه یوازې دا چې پر خپلو مټو د ډول ډول ستمونو ځنځیرونه ماتولی شي، بلکې کولای شي نور زیارکښان هم د استعماری او استثماري ستم څخه وژغوري.