هر هغه هیواد چې د خارجي ستمګرانو لخوا تر یرغل لاندې راشي، هلته د
زیارکښانو د وژلو تر څنګ د بیوزلۍ او بیکارۍ ناورین هم رامنځته کیږي. سره له دې چې
د ستمګرانو نړیواله سازمانونه ادعا کوي چې افغانستان په تیرو دیارلسو کلونو کې ښه
اقتصادي پرمختګ کړی دی، خو د خارجي ستمګرانو له ملاتړ څخه برخمن دولت چې د سرمایه
دارنو او لوټمارانو دولت دی، په وروستیو شمیرو کې په ښکاره توګه د بیکارۍ
زیاتوالي ته اشاره کوي.
د معلولینو او شهیدانو او د ټولنیز
چارو وزارت مرستیال حسام الدین همراه د غبرګولي په شپاړسمه نیټه وویل چې په
هیواد کې د بیکارۍ نرخ ۱۶ فیصده زیات شوی
او دا ګړۍ په ټول هیواد کې ۴.۵ میلیونه انسانان بیکاره دي. دا شمیرې په ښکاره توګه
هغه ناورین ته اشاره کوي چې د ښکیلاک په
پایله کې رامنځ ته شوی دی. ښکیلاک د وژنې او بربادۍ تر څنګ د بیوزلۍ او
بیکارۍ اصلي لامل دی، په تیره بیا چې دننه په هیواد کې داسې یو دولت د بهرنیانو په
مرسته وچلیږي چې د سرمایه دارانو او لوټمارو اربابانو او تاجرانو په خدمت کې وي.
وزګارتیا او بیکاري لامل کیږي چې ښکیلاکګران او د هغه کورنۍ دوست دولت،
ځوانان په ارزانه بیه د جګړۍ، جاسوسی او نورو ښکیلاکي کارونو لپاره استخدام کړي.
بیکاري لامل کیږي چې بیوزلي زیاته شي او دا بیوزلي د دې لامل کیږي چې د نورو
ستمونو او جنایتونو تر څنګ د فقر او نیستۍ له امله جنایت هم سیوا شي.
د ښکیلاکګرانو تاریخ په ټوله نړۍ کې ښودلی ده چې هیڅکله هوساینه، رفاه او
آزادۍ نشي راوستلی. په ښکیلاک کې زیارکښان اصلي قربانیان دي. همدا اوس افغانستان د
همدې قربانۍ یوه ښه بیلګه ګڼل کیږي. له هغه ورځ چې په افغانستان کې د پخواني او
اوسني ښکیلاک لړۍ شروع شوی ده، د افغانستان زیارکښانو ښه ورځ نه ده لیدلی. د دې
محرومو طبقاتو ورځنې ژوند د مرګ، ټپ، اسارت، بربادۍ، بیوزلي، فقر او بیکارۍ سره تړل
شوی دی. زیارکښان یوازې او یوازې هغه ورځ د هوساینې مخ لیدلی شي چې نه ښکیلاک وی
او نه زبیښاک او دا ستره بریا یوازې او یوازې د زیارکښانو په مټ تر لاسه کیدلی شي.
هیچ نظری موجود نیست:
ارسال یک نظر