ستمګران د زیارکښانو له وینو تویولو نه ستړي کیږي

له هغه ورځ چې د امریکا خونړۍ تیری پیل شوی، د هره ورځ په تیریدو د زیارکښانو د وژلو شمیره هم ډیریږي. امریکا، ناټو، طالبان او کورني وسله واله لوټمار په ګډه د زیارکښانو وینه تویوي او په دې توګه خپله دښمنې د زیارکښو طبقاتو سره ښکاره کوي.

 نن د چنګاښ په اتلسمه، د ملګرو ملتونو د سازمان بشري څانګې اعلان وکړ چې د تیرو شپږو میاشتو په پرتله د روان میلادي کال په شپږو میاشتو کې د ملکی (زیارکښانو) قربانیانو په کچه کې  ۲۴ سلنه زیاتوالی راغلی دی. د ملګرو ملتونو د راپور له مخې په یاده موده کې ۱۵۶۴ کسان وژل شوي  او ۳۲۸۹ نور یې ټپیان شوي دي. د یادونې وړ ده چې دا شمیرې په هیڅ توګه رښتني شمیرې نه دي، ځکه افغانستان د زیارکښانو قتلګاه ده او ښکاره ده چې د زیارکښانو د وژلو کچه د دې شمیرو څو څو برابره زیاته ده.

خو همدا خپرې شوې شمیرې هم په ښکاره توګه په دې خونړۍ قتلګاه کې د زیارکښانو د بیرحمانه وژلو او قرباني کولو جنایت څرګندوي. دلته په دې قتلګاه کې هره ورځ لسګونه زیارکښان یا وژل کیږی او یا هم د جنایت لړلی جګړې قرباني کیږي. کارګران، بزګران، ښوونکي، خیاطان، داکتران، انجنیران، ټیټ رتبه مامورین او نور زیارکښان په بیلابیلو نومونو او د بیلابیلو دښمنانو لخوا په بیرحمۍ وژل کیږي.

تیری، ښکیلاک، اسارت او د بهرنیو ستمګرو جنایتونه سبب کیږي چې زیارکښان دوزخې ژوند تجربه کړي. ښکیلاکګران د نورو هیوادونو د نیولو لپاره بیلابیلې پلمې جوړوي، چې بیلګه یې زمونږ په هیواد کې د «تروریزم ضد جګړه» او «له بشري حقونو څخه د دفاع» پلمه ده، هغه پلمه چې باید د کورنیو نوکرانو په مرسته عملي شي. له همدې امله که د ملګرو ملتونو سازمان هر څومره هم کوښښ وکړي چې د زیارکښانو وژنه په بیلابیلو ډلو وویشي، څو د بهرنیو ستمګرو د جنایت کچه کمه ښکاره کړي، خو مونږ زیارکښان دا جګړه یوه خونړۍ او په جنایت لړلۍ جګړه ګڼو چې ټولې ښکیلې خوا یې د بهرنیو ستمګرو د ستراتیژیک هدف په خدمت کې دي.