د مارچ اتمه، د زیارکښو ښځو د یووالي او مبارزې ورځ

آیا د مارچ اتمه د ټولو ښځو ورځ ده؟ آیا د مارچ اتمه د دې لپاره تجلیلوو چې ګویا ښځې میندې او خویندې او میرمنې دي؟ آیا دا ورځ د شتمنو او بیوزلو، د مفتخورو او کارګرو او زیارکښو، د ستمګرو او ستمځپلو ښځو ورځ ده؟ ولی ځینې نهادونه او بنسټونه کوښښ کوي چې دا ورځ په یوه عامه او مسخره ورځ بدله کړي؟

د مارچ اتمه د ټولو ښځو ورځ نه ده. دا د کارګرو او زیارکښو ښځو ورځ ده. زیارکښان دا ورځ د دې لپاره نه تجلیلوي چې ګویا ښځه مور، خور او میرمن ده، بلکې له دې لپاره یې لمانځي چې دا ورځ د کارګرو او زیارکښو ښځو ورځ ده. دا د زیارکښو او کارګرو ښځو د یووالي او پیوستون ورځ ده، هغه پیوستون چې  د ستمونو څخه د ژغورنې لپاره د ښځو مبارزې ته لور ورکوي.

د مارچ اتمه د شتمنو او مفتخورو او ستمګرو ښځو ورځ نه ده. دا ویاړلی ورځ د مدني ټولنو د نانځکو ورځ نه ده چې له ستمګرو سفارتونو د افغانستان د زیارکښو ښځو په نامه ډالرې شکوي. دا د هغو بیوزلو زیارکښو میرمنو ورځ ده چې د افغانستان د میرمنو لویه برخه  جوړوي او اوس د یرغلګرو تیري کونکو  د ستم تر څنګ د بیلابیلو بیرحمه زورواکو ستم او د نارینه تر ستم لاندې ژوند کوي.

ستمګران چې د زیارکښانو دښمنان دي هڅه کوي چې دا د کارګرو او زیارکښو ښځو ورځ په یوه عامه ورځ بدله کړي او د همدې لپاره میلیونونه ډالره خپلو نوکرانو ته ورکوي چې دا ورځ په یوه شنډه او بی مانا ورځ بدله کړي. ځکه چې ستمګران په دې ښه پوهیږي چې دا ورځ د کارګرو میرمنو د پیوستون ورځ ده، هغه پیوستون چې د ستمګرانو په وړاندې د قاطع او کلکی مبارزې سنګر جوړوي او د دې وحشي ستمګرو ماڼۍ ړنګولی شي.

په افغانستان کې دا ورځ  په داسې حال کې لمانځل کیږي چې زیارکښه ښځې د بهرنیو ستمګرو د جنایتونو قرباني کیږي او هره ورځ ورباندې د جنسي تیري یوه پیښه تیریږي. دا ورځ په افغانستان کې په داسې حال کې لمانځل کيږي چې په یو کال کې د ښځو په وړاندې څه باندې ۴۵۰۰ د تاوتریخوالی پیښې ثبت شوي دي. دا ورځ په داسې حال کې لمانځل کیږي چې د زیارکښو ښځو پر کورونو بهرني ستمګران بمباري کوي او بیا د خپلو مدني ټولنو نوکرانو او مزدورانو ته اینجوګانې جوړوي او پیسې ورکوي چې د ښځو د حقونو چیغې ووهي.

د افغانستان د زیارکښانو ټولنیز انجمن، د مارچ اتمه د ستمګرو او مفتخورو او د یرغلګرو او ارتجاعي سفارتونو د نانځکو ورځ نه ګڼي، بلکې دا ورځ د زیارکښو ښځو د پیوستون ورځ ګڼي چې باید د خپلې ژغورنې لپاره پر خپل مټ او توان حساب وکړي. زیارکښه ښځې باید د مارچ اتمه ورځ د هغه کنیزو له ولکې وباسي چې دا وخت ورباندې په بیرحمۍ سوداګري کوي. د مارچ اتمه د زیارکښو ښځو د پيوستون ورځ ده او باید د دې ورځ ارزښت په خپلې مبارزې تلپاتی وساتي.